Featured Events

  تزکیہ نفس فرائض ِنبوت کا بنیادی حصہ ہے۔جو اقرار کیا اس پر دل بھی گواہی دے دل بھی تصدیق کرے وہ یقین جو دل کی گہرائی تک اثر پیدا کرے۔جو ماننے سے عمل تک لے جائے۔عملی زندگی نبی کریم ﷺ کی سنت میں ڈھل جائے۔انفرادی زندگی سے لے کر اجتماعی زندگی تک ہر پہلو میں اپنا مثبت کردار ادا کرے۔
 امیر عبدالقدیر اعوان شیخ سلسلہ نقشبندیہ اویسیہ کا  شیفلڈ(انگلینڈ)  میں سراجا منیرا کانفرنس سے خطاب!
  انہوں نے کہا کہ اللہ کریم نے ہمیں اپنی عبادت کے لیے پیدا فرمایا ہے۔کائنات کی ہر شئے اللہ کی تسبیح بیان کر رہی ہے۔جس نے اللہ کا ذکر چھوڑ دیا اس کی زندگی ختم ہو جاتی ہے وہ فنا ہو جاتی ہے۔بندگی ہی انسانیت کا کمال ہے۔زندگی صرف گزارنے کا نام نہیں ہے۔اللہ کریم نے شکر اور انکار کا اختیار انسان کو دے دیا اب فیصلہ اس نے خود کرنا ہے کہ کس راہ کا انتخاب کرتا ہے۔اسم ِ اعظم پر بات کرتے ہوئے انہوں نے کہا کہ ایسی کوئی تسبیح نہیں ہے کہ جس کے کرنے سے بندہ جو چاہے ویسا ہو جائے یہ شان صرف اللہ کریم کی ہے وہ خالق ہیں وہ قادر مطلق ہیں جیسا وہ چاہیں گے ویسا ہو گا۔ یہ تو خدائی دعوے کی طرف لے کر جاتا ہے۔کہ جیسا میں چاہوں ویسا ہو جائے۔اللہ کریم کا ذاتی نام اللہ ہے باقی سب صفاتی نام ہیں پھر اسم اعظم اللہ کریم کے ذاتی نام کے سوا اور کونسا نام ہو سکتا ہے۔
انہوں نے مزید کہا کہ اللہ کریم کا شکر ہے کہ اُس نے اپنا نام لینے کی توفیق عطا فرمائی اپنے نام پر جمع فرمایا یہ اس کا احسان ہے وگرنہ وہ قادرہے ایسے لوگ پیدا فرما دے گا جن سے وہ محبت کرے گا اور وہ اللہ سے محبت کریں گے۔اپنی عبادات کو خالص اللہ کے لیے رکھیں جنت بھی اس لیے مانگی جاتی ہے کہ وہ اللہ کی رضا کامظہر ہے۔جنہیں اللہ کی رضا نصیب ہوگی جنت ان کی رہائش گاہ ہے۔فی ذات جنت مقصود نہیں فی ذات رب العالمین کی ذات مقصود رکھی جائے گی۔
آخر میں آپ نے امت مسلمہ کے اتحادو اتفاق کے لیے اجتماعی دعا بھی فرمائی۔
  یاد رہے کہ امیر عبدالقدیر اعوان شیخ سلسلہ نقشبندیہ اویسیہ برطانیہ کے دورہ پر ہیں جہاں مختلف شہروں میں سراجا منیرا کانفرنسز کا انعقاد کیا جا رہا ہے۔پروگرام میں آپ کا خطاب ہوتا ہے اور اجتماعی دعا بھی کی جاتی ہے۔

 امیر عبدالقدیر اعوان شیخ سلسلہ نقشبندیہ اویسیہ نے مانچسٹر (انگلینڈ) میں سراجا منیرا کانفر نس میں خواتین و حضرات کی بہت بڑی تعداد سے خطاب کرتے ہوئے کہا کہ قرآن کریم ال م سے والناس تک ہمیں سراجا منیرا کا درس دیتا ہے۔آپ ﷺ کی ذات روشنیاں بانٹنے والاچراغ ہے۔قرآن کریم کلام ذاتی ہے جیسی متکلم کی حیثیت ہوتی ہے ویسی ہی کلام کی اہمیت بھی ہوتی ہے۔بادشاہ کا کلام،کلاموں میں بادشاہ ہوتا ہے۔ہماری یہ حیثیت نہیں کہ ہم اللہ کریم کے کلام کی شان بیان کر سکیں۔آپ ﷺ انسانیت کو اندھیروں سے روشنیوں کی طرف لے کر آئے۔دین اسلام کا ہر حکم ہر جگہ ہر ایک کو استفادہ عطا فرماتا ہے۔ہر سوال کا جوا ب قرآن کریم میں موجود ہے ہر قسم کی راہنمائی موجود ہے جو سوال گزر چکے جو سوال موجود ہیں جو سوال آنے والے زمانے میں پیدا ہوں گے سب کی راہنمائی ہمیں قرآن و سنت سے میسر ہے۔
  انہوں نے کہا کہ قرآن کریم ہمیں مقصد تخلیق سے آگاہ فرماتا ہے اور نتائج کے حوالے سے بھی شناسائی عطا فرماتا ہے۔کائنات کی ہر شئے با مقصد ہے انسان تو اشرف المخلوقات ہے فرشتے جو کہ نوری مخلوق ہے اُسے بھی حکم ہوا جب آدم کی تخلیق مکمل ہو گی تو اس کے آگے سجدہ ریز ہو جانا۔انسان اس کائنات کا مرکزی کردار ہے تو کیا یہ بامقصد نہیں ہم اس سے غافل ہیں ہمارے شب وروز گزر رہے ہیں اور صرف گزر رہے ہیں ہمیں ادراک نہیں کہ یہ وقت یہ سانسیں کتنی قیمتی ہیں۔اس ادراک کے لیے درِ مصطفے ﷺ کی ضرورت ہے۔رب کائنات نے یہ در عطا فرمایا ہے یہاں سے اس مخلوق کو خالق نے ذاتی آشنائی عطا فرمائی۔آج معاشرہ اس حد تک پہنچ چکا ہے کہ عشق مصطفے ﷺ میں تضاد پائے جاتے ہیں یہ تو وہ در ہے جہاں سے حیات نصیب ہوتی ہے۔اور قرآن کریم ایسی کتاب جس میں شک و شبہ کی کوئی گنجائش نہیں اس کے باوجود لوگ قرآن کریم ہا تھ میں پکڑ کر ایک دوسرے کے خلاف فتوے دے رہے ہیں۔ہمارے سارے جھگڑے اپنی پسند کی وجہ سے ہیں ہمارے اندر سے میں نہیں جا رہی ہر کوئی کہتا ہے کہ میں جو کہہ رہا ہوں وہ ٹھیک ہے باقی سب غلط۔تو اتباع محمد الرسول اللہ ﷺ اس میں کو مٹا دیتا ہے۔بندہ اللہ اور اللہ کے رسول ﷺ کے حکم کے تحت آجاتا ہے۔اللہ کریم ہمیں صحیح شعور عطا فرمائیں۔
آخر میں انہوں نے تمام ساتھیوں کو قلبی ذکر سکھایا اور اس کی ہمیت بیان فرمائی۔بعد میں حضرت مد ظلہ العالی نے ذکر اللہ بھی کروایا۔یاد رہے کہ حضرت امیر عبدالقدیر اعوان برطانیہ دورہ پر ہیں جہاں مختلف شہروں میں سراجا منیرا کانفرنسز کا انعقاد ہو رہا ہے۔جس میں آپ خصوصی لیکچر دے رہے ہیں۔آخر میں آپ نے امت مسلمہ کے اتحاد و اتفاق کے لیے اجتماعی دعا بھی فرمائی۔

  اسی دنیا کی زندگی پر جزا و سزا کا انحصار ہے۔ہمارے اعمال اگر صالح ہیں تو ہمیں اس دنیا میں بھی اور آخرت میں بھی اس کا بدلہ نیک ملے گا اگر ہمارے اعمال بد ہیں تو اس دنیا میں بھی اور آخرت میں سزا کا سبب ہوں گے۔اگر درست راہ کو اختیار نہیں کریں گے تو نقصان اُٹھائیں گے۔اللہ کریم نے زندہ رہنے کا اور عقیدہ اختیار کرنے کا حق ہر ایک کو عطا فرمایا ہے۔کوئی کسی کی زندگی چھیننے کا اختیار نہیں رکھتا اور نہ کوئی اپنا عقیدہ کسی پر مسلط کرسکتا ہے۔
 امیر عبدالقدیر اعوان شیخ سلسلہ نقشبندیہ اویسیہ کا برمنگھم (انگلینڈ) دارالعرفان میں اجتماع سے خطاب
  انہوں نے کہا کہ انسان اللہ کریم کی ایسی تخلیق ہے جس کو یہ استعداد عطا فرمائی گئی ہے کہ یہ صحیح اور غلط کو پہچان سکتا ہے۔ اس کے باوجوداپنے گردوپیش جس طرح کی روش یہ دیکھتا ہے اُسے اختیار کرتاچلا جاتا ہے۔بنیادی طور پر اس کے اندر حق اختیار کرنے کی استعداد تخلیقی طور پر موجود ہے۔ایک وقت تھا جب نبی کریم ﷺ کی واحد ذات تھی جنہوں نے گھٹا ٹوپ اندھیرے میں حق اختیار کیا حق بیان فرمایا اور اللہ کریم نے جن لوگوں کو ہدایت عطا فرمائی کیا وہ پہلے ایمان والے تھے؟ آپ ﷺکی تعلیمات آپ کا مزاج آپ کا پیار اور اُنس لوگوں کے ایمان کا سبب بنا۔اسلام ابتداء ہی سے سلامتی ہے اور ہر ایک کے لیے سلامتی کی ضمانت ہے۔دین اسلام کے کسی حصے کا بھی انکار نہیں کیا جا سکتا۔
  انہوں نے مزید کہا کہ اطاعت صرف دعوی ایمان کا نام نہیں ہے بلکہ لاالہ الاللہ کا مطلب ہے کہ اللہ کے سوا کوئی ایسا نہیں جس کی اطاعت کی جائے گی۔دوسرے حصے میں محمد الرسول اللہ کیسے اطاعت کرنی ہے جیسے آپ ﷺ نے ارشاد فرمایا اور جیسے آپ ﷺ نے اللہ کریم کی اطاعت کی۔دین اسلام کے احکامات عین انسانی مزاج کے مطابق ہیں کیونکہ یہ دین فطرت ہے اور تمام فطری تقاضے پورے فرماتا ہے۔نبی کریم ﷺ کا پیغام پوری انسانیت تک پہنچ چکا ہے یہ محافل یہ اجتماعات دستک ہیں کہ بندہ کے لیے ایک یاد دہانی ہے۔نبی کریم ﷺ دین اسلام کی تکمیل کا اعلان فرما چکے ہیں پھر عمل کیوں نہیں ہو رہا اس لیے کہ ہمارے دل میں ایمان کا وہ یقین نہیں ہے جو درکار ہے ا سکے لیے تصوف کی ضرورت پیش آتی ہے۔ جب تک دعوے ایمان کے ساتھ دل کی تصدیق مضبوط نہ ہو چیزیں عمل تک نہیں پہنچتی۔  اللہ کریم صحیح شعور عطا فرمائیں۔

اسی زندگی کو اطاعت محمد الرسول اللہ ﷺ سے مزین کرنا ہے قرآن کریم میں ارشاد ہے کہ کوئی زی روح ایسا نہیں جس کا رزق اللہ کریم نے اپنے ذمہ نہ لیا ہو۔ہر فرد کے اندر اللہ کریم حق اختیا ر کرنے کی استعداد رکھ دی ہے اب یہ ہر ایک کا اپنا فیصلہ ہے کہ کون حق کا راستہ اختیار کرتا ہے اور کون انکار کا راستہ اختیار کرتا ہے۔ہمارے تمام مسائل کی وجہ چاہے انفرادی ہوں یا اجتماعی ان سب کا سبب نبی کریم صلی اللہ علیہ وسلم کی حکم ادولی ہے نافرمانی ہے۔اور ان تمام مسائل کا حل آپ ﷺ کی اطاعت میں ہے اتباع میں ہے۔
 امیر عبدالقدیر اعوان شیخ سلسلہ نقشبندیہ اویسیہ کا لندن (انگلینڈ) میں سراج منیرا کانفرنس سے خطاب
  انہوں نے کہا کہ اللہ کریم ستر ماؤں سے زیادہ اپنے بندے سے پیار کرتے ہیں مگر ضرورت انابت کی ہے اس خالق نے نہ صرف ضرورت بلکہ احساس ضرورت اورضرورت کی تکمیل کے زرائع بھی عطا فرمائے۔ہر ایک کی ہر جگہ ہر وقت ہر ضرورت کو پورا فرمانا اُس رب کائنات کی شان ِ ربوبیت ہے۔اللہ اور اللہ کے حبیب ﷺ کا حکم ماننا اور ایسا ماننا کہ نہاں خانہ دل تک اس میں شامل ہو اسے اطاعت کہیں گے۔بندہ مومن کی نشانی یہ ہے کہ جب اس کے پاس اللہ کا حکم آتا ہے تو وہ اس کی اطاعت کرتا ہے۔
  انہوں نے مزید کہا کہ تقوی یہ ہے کہ بندگی کے ہر عمل کو دیکھا جائے کہ کوئی عمل مجھ سے ایسا نہ ہوجائے جس سے میرے اللہ کریم مجھ سے ناراض ہو جائیں اس ڈر کو تقوی کہتے ہیں۔ہر وہ کام جو نبی کریم ﷺ کے اتباع میں کیا جائے گا اُسے نیک عمل کہا جائے وہی نیکی ہے جو آپ ﷺ کی سنت ہے جو آپ ﷺ کا ارشاد ہے۔اللہ کریم ہم سب کا مل بیٹھنا قبول فرمائے