Featured Events

یوم آزادی منانے کی نہیں اختیار کرنے کی ضرورت ہے۔جب ہم اسے اختیار کریں گے تو بحیثیت مجموعی اس کے محافظ ہوں گے۔وطن عزیز بے پناہ قربانیوں کے نتیجے میں معرض وجود میں آیا ہے اور یہ قربانیاں ہم ابھی تک دئیے جا رہے ہیں۔وطن عزیز پاکستان اسلام کے نام پر بنا ہے اور اسلام امن،محبت اور بھائی چارے کا درس دیتا ہے۔آج ضرور ت اس امر کی ہے کہ ہم اپنے آباؤ اجداد کی قربانیوں کو اس طرح یاد رکھیں کہ اس ملک کی بقا کے لیے اپنا مثبت کردار ادا کریں۔اس کا ایک ایک ذرہ ایک ایک ادارہ ہمارا ہے ہم اس سے ہیں اور اس کی نگہبانی ہم پر فرض ہے۔میری سالکین سے گزارش ہے کہ ایسا کوئی کام،کوئی بات نہ کریں جس سے ملک و قوم میں خرابی پیدا ہو۔جہاں کوئی ہے ملک کی تعمیر میں اپنے حصے کا مثبت کردار ادا کریں۔
 امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان کا دارالعرفان منارہ میں 40 روزہ سالانہ اجتماع کے اختتام پر سالکین کی بہت بڑی تعداد سے خطاب!
  انہوں نے کہا کہ اجتماع کا مقصد شب و روز کے معمولات اورذکر الٰہی سے دلوں پر وہ دستک عطا ہوتی ہے کہ سالک خود کو اللہ کے روبرو محسوس کرتے ہوئے عمل صالح اختیار کرتا ہے۔اور اپنے ہر عمل کو خالص اللہ کی رضا کے لیے کر رہا ہوتا ہے۔یہاں پر آنے والے سالکین کی بلا تفریق تربیت کی جاتی ہے۔اللہ اللہ کی تکرار سے کیفیات قلبی کا حصول ممکن ہوتا ہے جس کا ثمر یہ ہوتا ہے کہ اپنے گھر سے لے کر معاشرے تک کو سنوار دیتا ہے۔
  انہوں نے مزید کہا کہ ہمارے بچے،ہماری اولادیں ہمارا اثاثہ ہیں۔ان کی تربیت ایسے کریں کہ یہ اغیار کے ہاتھوں کا کھلونا نہ بنیں بلکہ انہیں اپنی اقدار اور دین اسلام کی تعلیمات سے روشناس کرائیں۔اللہ کی راہ میں مال خرچ کرنے کا حکم ہے لیکن ہمارے مال پر سب سے زیادہ حق ہمارے والدین کا ہے۔اس کے بعد عزیز و اقارب،مسافر اور قیدیوں کا ہے۔صبر پر انہوں نے بات کرتے ہوئے کہا کہ خود کو شریعت مطہرہ پر کاربند کرنے کا نام صبر ہے۔بندہ مومن کا معاشرے میں کردار ایسا ہو نا چاہیے کہ اس کے قول و فعل سے معاشرے کی تعمیر ہو ہمارے معاملات سے لوگ کہیں کہ مسلمان ایسے ہوتے ہیں۔اللہ کریم صحیح شعور عطا فرمائیں۔آخر میں انہوں نے ملک میں امن اور بقا کی اجتماعی دعا بھی فرمائی۔
  یاد رہے کہ دارالعرفان منارہ میں 40 روزہ سالانہ اجتماع جاری تھا جس کا آج اختتامی بیان تھا اور اجتماعی دعا بھی تھی ملک بھر سے سالکین کی بڑی تعداد نے اس بابرکت محفل میں شرکت کی۔خواتین کی بہت بڑی تعداد بھی اس محفل میں شریک ہوئی۔اجتماع کے اختتام پر ڈویژنل سطح پر ذمہ داران میں حسن کاکردگی پر حضرت جی مد ظلہ العالی نے اپنے دست مبارک سے شیلڈ تقسیم کیں جس میں پہلی پوزیشن راولپنڈی ڈویژن دوسری سرگودھا ڈویژن اور تیسری پوزیشن گوجرانوالا نے حاصل کی۔اس کے علاوہ الفلاح فاؤنڈیشن کی کارکردگی میں ڈی آئی خان نے پہلی جب کہ راولپنڈی نے دوسری پوزیشن حاصل کی۔اس کے علاوہ شعبہ نشرواشاعت میں فیصل آباد نے پہلی اور گوجرانوالا نے دوسری پوزیشن حاصل کی۔

 دین اسلام بندہ مومن کی مال کمانے سے لے کر خرچ کرنے تک کی راہنمائی فرماتا ہے۔مال و دولت سے محض دنیاوی سکون کا حصول ناممکن ہے۔اگر اسی مال کو ان اصولوں کے ساتھ حاصل کیا جائے جس کا حکم ہمیں اللہ اور اللہ کے حبیب ﷺ نے فرمایا ہے پھر اس سے زندگی میں ٹھہراؤ اور سکون عطا ہوگا۔
 امیر عبدالقدیر اعوان شیخ سلسلہ نقشبندیہ اویسیہ وسربراہ تنظیم الاخوان پاکستان کا جمعتہ المبارک کے موقع پر خطاب!!
  انہوں نے کہا کہ دنیا کے تمام مذاہب بندے کو اس کی آمدن پر ٹیکس وغیرہ کی ادائیگی کے بعد آزاد کر دیتے ہیں کہ وہ بچ جانے والے مال کو جس طرح چاہے خرچ کرے لیکن دین اسلام آمدن، ذرائع آمد ن اور پھر خرچ کرنے تک کی راہنمائی فرماتا ہے۔اس سے یہ احساس بھی بندہ مومن کے دل میں آتا ہے کہ میرے پاس یہ سب کچھ اللہ کی امانت ہے۔دین اسلام دین فطر ت ہے اس پر عمل زندگی کے کسی پہلو میں رکاوٹ اور خلش نہیں آنے دیتا۔
  یاد رہے کہ دارالعرفان منارہ میں 40 روزہ سالانہ روحانی اجتماع جاری ہے جس میں ملک اور بیرون ملک سے سالکین اپنی روحانی تربیت کے لیے آئے ہوئے ہیں جن کو باقاعدہ ایک تربیتی پروگرام سے گزارا جاتا ہے۔اور مختلف ضروریات دین کے تربیتی کورسز بھی کرائے جاتے ہیں۔ان کورسزکے امتحانات پاس کرنے والے سالکین میں شیخ المکرم حضرت جی مد ظلہ العالی اپنے دست مبار ک سے اسناد تقسیم فرماتے ہیں۔13 اگست بروز اتوار دن 11 بجے شیخ المکرم حضرت جی مد ظلہ العالی اختتامی بیان اور اجتماعی دعا فرمائیں گے۔دعوت عام دی جاتی ہے کہ اس بابرکت اور روحانی محفل شرکت کے لیے تشریف لائیے