Featured Events

اللہ کریم نے ہر ایک کا رزق اپنے ذمہ لیا ہے ہم اس کو اپنے زورِ بازو حاصل کرنے کی کوشش کر رہے ہیں۔ دین کے احکامات پر عمل کرنے کا حکم ہے جسے ہم یہ کہہ کر اپنے آپ کو تسلی دے لیتے ہیں کہ اللہ کریم ہم پر رحم فرمائیں گے وہ بڑے معاف کرنے والے ہیں۔نماز کوباقاعدہ اہتمام اور مکمل خشوع و خضوع کے ساتھ ادا کرنے سے حق سے شناسائی کا وہ درجہ نصیب نصیب ہوتا ہے کہ بندہ مومن باعمل ہو جاتا ہے۔
 امیر عبدالقدیر اعوان شیخ سلسلہ نقشبندیہ اویسیہ وسربراہ تنظیم الاخوان پاکستان کا جمعتہ المبارک کے موقع پر خطاب۔
  انہوں نے کہا کہ رب کریم ہماری ہر ضرورت اور حاجت کو جانتے ہیں اور اس کو پورا کرنے کے لیے اسباب بھی عطا فرمائے اور راہنائی بھی فرمائی۔فرمایا کہ نماز اور صبر سے مدد حاصل کرو۔صبر کی تشریح بیان کرتے ہوئے مولانا امیر محمد اکرم اعوان ؒ فرماتے ہیں کہ سرپٹ دوڑتے ہوئے گھوڑے کو لگام کھینچ کر روک لیا جائے اس طرح اپنے آپ کو پوری قوت سے اللہ کریم کی نافرمانی سے روک لینا صبر کہلاتا ہے نماز کی ادائیگی سے صبر کا حصول ممکن ہوگا۔نماز پڑھنا مجاہدہ اختیاری ہے نمازکی ادائیگی کبھی عادت نہیں بنتی۔اس لیے اس مجاہدے کا اجر بھی بہت زیادہ ہے۔اللہ کریم سے ہی عبادات کی ادائیگی کی توفیق مانگنی چاہیے۔یاد رکھیں کہ جن کے دل میں خشوع ہے ان کے لیے عبادات دشوار نہیں ہیں اور خشوع و خضوع کا حصول شعبہ تصوف کے بغیر ممکن نہیں ہے۔
  یاد رہے کہ سلسلہ نقشبندیہ اویسیہ کے تحت ملک بھر ربیع الاول کی نسبت سے بعثت رحمت عالم ﷺ کے موضوع پر جلسوں کا انعقاد ہو رہا ہے جن میں فیصل آباد،ڈیرہ غازی خاں،ایبٹ آباداور بھمبر کشمیر کے جلسے بھی شامل ہیں ان میں حضرت امیر عبدالقدیر اعوان مد ظلہ العالی خصوصی خطاب فرمائیں گے اور اجتماعی دعا بھی ہو گی۔ہر خاص وعام کو شرکت کی دعوت دی جاتی ہے۔

حضور اکرم ﷺ کی ولادت باسعادت تمام جہانوں کے لیے رحمت ہے اور رب کریم نے آپ ﷺ کو رحمت کا سبب بنایا۔ نسبی رشتہ بہت بڑی عطا ہے لیکن آپ ﷺ کی بعثت ِ عالی ؐ سے صاحب ِ ایمان کے ساتھ امتی کا رشتہ قائم ہوتا ہے اور اقوامِ عالم پر امت ِ محمدیہ ؐ کی شہادت روزِ آخرت ہو گی۔ اظہارِ محبت اور اظہارِ عقیدت میں ان حدود و قیود کا خیال رکھیں جس کا حکم ہے۔ حد ِ ادب سے تجاوز احترام میں شمار نہیں ہو گا۔
 امیر عبد القدیر اعوان شیخ سلسلہ نقشبندیہ اویسیہ وسربراہ تنظیم الاخوان پاکستان کا  بعثت ِ رحمت ِ عالم ﷺکے موضوع پر بہت بڑے اجتماع سے خطاب!
انہوں نے مزید کہا کہ عشق مصطفی  ؐ کا تقاضا اور امتی کی ذمہ داری یہ ہے کہ 1400سو سال کی اس دوری نے ہمارے مزاجوں کو اتنا گرد آلود کر دیا ہے کہ ان خوبصورت ترین رشتوں کو عقیدت کی ان اعلیٰ ترین مثالوں کو رواجات کی نذر کر دیا۔ ماہِ مبارک ربیع الاول میں ہم اظہارِ محبت میں اس حد تک چلے جاتے ہیں کہ ہماری فرض نمازیں رہ جاتی ہیں اور اس میں صحیح غلط کی کوئی تفریق نہیں رہتی، ہمارے لیے یہ لمحہ فکریہ ہے جس دین اسلام کی خاطر خانوادہئ رسول ؐ نے اپنے سمیت سارا خاندان قربان کر دیا لیکن دین اسلام کے کسی حکم میں کمی بیشی نہ ہونے دی۔  ہم آپ ﷺ کے ساتھ کسی ایک دن کو مقرر کریں اور اس دن کو منا کر باقی سال اپنی روش پر رہیں تو یہ صرف رواج ہو گا اظہارِ محبت نہیں۔ آج ہم اپنی عملی زندگی میں دیکھیں کتنے ایسے اعمال ہیں جو دین اسلام سے باہر ہیں۔ اللہ کریم ہمیں معاف فرمائے اور عملی زندگی کو اسوہئ حسنہ پہ گزارنے کی توفیق عطا فرمائے۔
یاد رہے کہ حضرت امیر محمد اکرم اعوان ؒ نے آج سے بارہ سال پہلے ان جلسوں کا سالانہ انعقاد کا آغاز کیا اور موضوع بعثت ِ رحمت ِ عالم ؐ رکھاکہ ولادت باسعادت مومن و کافر دونوں کے لیے باعث ِ رحمت ہے۔ لیکن بعثت ِ عالی ؐ کا تعلق خاص طور پر مومنین کے لیے ہے۔ اس کا اظہار ہونا چاہیے۔ اس عظیم الشاں پروگرام میں پنجاب کے ڈویژنوں نے نمائندگی اور شرکت کی۔ اور مسجد دارالعرفان کے تمام حال کھچاکھچ بھرے ہوئے تھے۔حال فجاء محمد سراجا منیرا ۔۔۔  فصلوا علیہ کثیرا کثیرا سے گونجتا رہا۔ اس پروگرام میں خواتین کی ایک کثیر تعداد نے بھی شرکت کی۔