Featured Events

 آج ہمارے معاشرے میں بے چینی کی بڑی وجہ ہماری بداعمالیاں ہیں۔ہمارے بد اعمال ہی ہیں جن کا پرتاؤآخرت میں تپش کی صورت ہم یہاں محسوس کررہے ہیں۔زندگی کے ایک ایک لمحے کا اسلوب آپ ﷺ کے اسوہ حسنہ میں موجود ہے۔اللہ کریم ہمارے حکمرانوں کو بھی نظام مصطفے ﷺ کے نفاذ کی توفیق عطا فرمائیں۔قوانین جتنے بھی بنا لیں اگر ان کا اطلاق نہیں ہوگا تو ان کا کوئی فائدہ نہیں۔ہمیں تو سوچنے کی ضرورت ہی نہیں کیونکہ ہمارے پاس بنا بنایا نظام  موجودہے بس اسے نافذ کرنے کی ضرورت ہے۔صرف اسلامی نظام سے ہی ہم موجودہ مشکلات سے نکل سکتے ہیں۔
 امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان کا سالانہ اجتماع کے آخری روز خواتین و حضرات کی بڑی تعداد سے خطاب۔
  انہوں نے کہا کہ قلب انسانی احساسات کا گھر ہے۔اگر بندے کو یہ ادراک ہو جائے کہ میں ہر وقت اللہ کے روبرو ہوں تو نہاں خانہ دل میں اُٹھنے والی نیت صاف ہوتی چلی جاتی ہے۔تمام اعمال کا انحصار اسی نیت پر ہے۔آج ہمارے قلوب بے کیف ہو چکے ہیں ان میں احساس باقی نہیں رہا۔تمام طرح کی کیفیات کا گھر قلب انسانی ہے اسی میں دوستی کی کیفیت ہوتی ہے اسی میں دشمن بھی بستے ہیں۔ اگر اس دل میں اللہ کریم کی محبت پیدا ہو جائے تو بندہ مرضیات باری میں فنا ہو جاتا ہے اسے وہی پسند ہوتا ہے جو اللہ کریم کو پسند ہو۔
  یاد رہے کہ سلسلہ نقشبندیہ اویسیہ مرکز دارالعرفان منارہ میں چالیس روزہ سالانہ اجتماع جاری تھا جس کا آج آخری روز تھا جس میں تقابلی جائزہ بھی لیا گیا اورڈویژن کی سطح پر بہتر کارکردگی پر حضرت نے اپنے دست مبارک سے زمہ داران میں اعزازی شیلڈ پیش کیں۔  ملک کے طول و عرض کے علاوہ بیرون ممالک سے بھی سالکین سلسلہ عالیہ تشریف لائے اور اپنی روحانی تربیت کی۔اس کے علاوہ جناب فاروق ستار ایم این اے کراچی سے خصوصی طورپر تشریف لائے۔
آخر میں حضرت نے خصوصی اجتماعی دعا فرمائی اور ملک و قوم کے لیے اور مسلم امہ کے لیے بھی خصوصی دعائیں کی گئیں

 دین اسلام نے بندہ مومن کو غلامی کی زنجیروں سے نکال کر وہ خوبصورت زندگی عطا فرمائی ہے جو ذہنی غلامی سے آزاد کر کے ایک ذات وحدہ لا شریک کی اطاعت میں لے آتی ہے۔ جسے بھی  ایمان کی حالت میں نبی کریم ﷺ کی صحبت نصیب ہوئی وہ درجہ صحابیت کو پا گئے۔آپ ﷺ امام الانبیاء ہیں آپ جب بھی کسی معاملے میں یا نزول قرآن کے وقت پوچھتے کہ اس آیت کے بارے کیا جانتے ہو تو صحابہ عرض کرتے ہمارے ماں باپ آپ پر قربان۔اللہ اور اللہ کے رسو ل ﷺ بہتر جانتے ہیں پھر بھی آپ ﷺ اپنے صحابہ کرام سے امور دنیا میں مشورہ کیا کرتے تھے۔مشورہ کا ایک اصول ہے کہ مشورہ حکم نہیں ہوتا ایک رائے ہوتی ہے لینے والے کو بھلی لگے نہ لگے اس پر عمل کرے نہ کرے ہمارے ہاں اگر مشورے پر عمل نہ کیا جائے تو ناراضگی ظاہر کی جاتی ہے کہ میرے مشورے کو اہمیت نہیں دی گئی اس پر عمل نہیں کیا گیا۔مشورہ امانت ہوتا ہے اس میں خیانت نہ ہو۔اگر کسی سے کوئی مشورہ کرتا ہے تو اسے چاہیے کہ مشورہ دے اور اچھا مشورہ دے۔
 امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان کا جمعتہ المبارک کے موقع پر خطاب۔
  انہوں نے کہا کہ دین اسلام کے اصول زندگی کے ہر پہلو میں ہماری راہنمائی فرماتے ہیں اور ہماری ضرورت ہیں۔یہی وہ اصول ہیں جن میں ہماری قوم کی حیات ہے۔آج کے حالات بہت مشکل ہیں روزانہ خبر آتی ہے کہ ہمارے اتنے جوان شہیدہو گئے ہیں۔اگر ہم یہ اصول اپنائیں جو اللہ کریم نے ہمیں عطا فرمائے ہیں جن کی حدود و قیود کا تعین محمد الرسول اللہ ﷺ نے فرمایا ہے اگر مسلمان معاشرے ان پر عمل پیرا ہوں تو ایسی صورت حال نہ پیش آئے۔اللہ کریم وطن عزیز کی حفاظت فرمائیں اور شہداء کی قربانیاں قبول فرمائیں۔ 
  یاد رہے کہ سلسلہ نقشبندیہ اویسیہ کے مرکز دارالعرفان منارہ میں چالیس روزہ سالانہ روحانی تربیتی اجتماع جاری ہے جس کا اختتامی بیان و اجتماعی دعا 12 جولائی بروز اتوار ہوگی۔جس میں ملک کے طول و عرض سے سالکین سلسلہ عالیہ تشریف لائیں گے۔دعوت عام ہے کہ اس بابرکت پروگرام میں شرکت فرما کر اپنے قلوب کو برکات نبوت ﷺ سے منوری کیجیے۔