Featured Events

نبی اکرم ﷺ ساری انسانیت کے لیے مجسم رحمت ہیں،ماہ ربیع الاول میں جو ہم اظہار محبت کرتے ہیں اس میں بھی حدود و قیودکو ملحوظ خاطر رکھنا ضروری ہے۔امیر عبدالقدیر اعوان
نبی کریم ﷺ کو مجسم رحمت بنا کر بھیجا گیا ہے۔اظہار محبت اور اظہار عقیدت ماہ ربیع الاول کی مناسبت سے ضرور ہونی چاہیے لیکن ان حدود و قیود کا خیال رکھا جائے جن کا حکم بعثت رحمت عالم ﷺ کے ساتھ تمام مومنین پر ضروری ہے ان کا پابند ہونا ہوگا۔اپنی ذات کو بالائے طاق رکھتے ہوئے ایک ایک لفظ پر عمل کرنا ہوگا۔
امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان کا بعثت رحمت عالم ﷺ کانفرنس لاہور کینٹ میں خواتین و حضرات کی بڑی تعداد سے خطاب۔۔
انہوں نے کہا کہ ماہ ربیع الاول کو ایام کے ساتھ مقید نہ کیا جائے۔ ہر مومن پر لازم ہے کہ وہ اپنی خواہشاتِ نفسانی کو پسِ پشت ڈالتے ہوئے شریعت کے بتائے ہوئے راستے پر چلے اور اپنے ہر قول و فعل کو شمعِ نبوت کی روشنی میں پرکھے۔ یہ محبت صرف چند رسمی تقریبات یا مخصوص ایام تک محدود نہیں، بلکہ اس کا تقاضا یہ ہے کہ ہم اپنی زندگی کے ہر سانس اور ہر لمحے کو آپ ﷺ کی سیرتِ طیبہ اور احکامات کے تابع بنا دیں۔
 انہوں نے مزید کہا کہ حقیقی عید میلاد النبی وہی ہے جب ہماری پوری زندگی رسول اللہ ﷺ کے اسوہ حسنہ کی عملی تصویر بن جائے۔ اسی میں ہمارے ایمان کی تکمیل، ہماری محبت کی صداقت اور ہماری نجات کا راز پوشیدہ ہے۔
انہوں نے ملک میں موجود مختلف طبقات، بشمول فورسز، علماء، تاجر برادری اور عدالتی نظام سے وابستہ افراد کو مخاطب کرتے ہوئے کہا کہ یہ تمام ادارے ملک کی ریڑھ کی ہڈی ہیں۔ ہمارے فوجی جو روزانہ کی بنیاد پر شہید ہو رہے ہیں اللہ کریم ان کی قربانیاں قبول فرمائیں۔شہداء کے والدین اپنی آنکھوں کے نور کے جسد خاکی وصول کرتے ہیں یہ ان کا ہی حوصلہ ہے۔اللہ کریم والدین کو اس اجر عطا فرمائیں۔انہوں نے کہا کہ ہمارے درمیان سیاسی اختلافات ہو سکتے ہیں، لیکن اگر یہ اختلاف ملک کو نقصان پہنچانے کی حد تک پہنچ جائیں تو ایسی صورت میں بحیثیت مسلمان ہمارا فرض بنتا ہے کہ ہم ملک کے تحفظ کو ترجیح دیں۔
انہوں نے کہا، ''جس طرح ہم اپنے گھر کا ٹوٹا ہوا برتن بھی باہر نہیں پھینکنا چاہتے، اسی طرح ہمیں اپنے ملک کے معاملات میں بھی احتیاط سے کام لینا چاہیے۔'' انہوں نے حدیث مبارکہ کا حوالہ دیتے ہوئے کہا کہ نبی کریم ﷺ نے فرمایا ہے کہ راستے سے تکلیف دہ چیز کو ہٹانا ایمان کا حصہ ہے۔
انہوں نے اللہ تعالیٰ سے دعا کی کہ وہ ہمیں سیرتِ نبوی ﷺ کو سمجھنے، اس پر عمل کرنے اور اس کی روشنی میں اپنی زندگیوں کو ڈھالنے کی توفیق عطا فرمائے۔اللہ کریم صحیح شعور عطا فرمائیں۔آخر میں انہوں نے ملکی سلامتی اور سیلاب زدگان کے لیے خصوصی دعا بھی فرمائی۔
  یاد رہے کہ اس بابرکت پروگرام میں جہاں ہرطبقہ فکر کے لوگوں نے شرکت کی وہاں سیاسی و سماجی شخصیات کی بڑی تعداد بھی موجود تھی جن میں شیخ روحیل اصغر سابق مشیر وزیر اعظم،فیڈرل منسٹر رانا مبشر،تنویر اسلم سیتھی،بلال یاسین ایم پی اے،مولانا سرفراز اعوان،مولانا اسید الرحمان،سعد نذیر چئیر مین بلیو ورلڈ سٹی بھی شامل تھے

 اپنی غلطیوں اور لغزشوں سے اس طرح اللہ کریم سے معافی کے طلبگار ہوں کہ یا اللہ مجھے توفیق عطا فرما کہ آئندہ گناہوں سے بچ سکوں۔ خود سے نہ کہیں کہ میں ایسا نہیں کروں گا۔میں کو نکال دیں اور عمل کی توفیق بھی اللہ کریم سے مانگیں۔جو بندہ اقرار کر کے انکار کرتا ہے اس پر اللہ کی اورفرشتوں کی لعنت ہوتی ہے۔لعنت سے مراد اللہ کی رحمت سے دوری ہے۔یعنی اس کے پاس کچھ نہ رہا۔
 امیر عبدالقدیر اعوان شیخ سلسلہ کا جمعتہ المبارک کے روز خطاب۔
  انہوں نے کہا کہ کیفیات قلبی کا تسلسل قلب اطہر محمد الرسول اللہ ﷺ سے جاری ہے۔جب اللہ کا نام بندہ مومن کے دل میں رچ بس جاتا ہے تو اس کے وجود کا ذرہ ذرہ ذاکر ہو جاتا ہے۔صحابہ کرام ؓ  کو جو عظمتیں نصیب ہوئیں اس کا سبب معیت محمد الرسول اللہ ﷺ ہے  اس درجہ کی جلا نصیب ہوئی کہ ظاہر سے باطن تک ایمان ایسا نصیب ہوا جس کی مثال نہیں ملتی۔شعبہ تصوف میں بھی جو داخل ہو اس کے لیے ضروری ہے کہ وہ اس نزاکت کو سمجھے کہ اپنی ذات پر نہ آئے بلکہ مرکوز ذات باری تعالی کو رکھے۔جب بندہ اپنی ذات میں پھنس جائے تو یہ غلطی اجاڑ کر رکھ دیتی ہے۔
  انہوں نے مزید کہا کہ جو کفر پر مر گیا اس کے لیے نہ کوئی دولت کام آئے گی نہ سفارش کام آئے گی۔یہاں تو لوگ کہتے ہیں کہ انصاف خرید لیں گے یہاں انصاف ہے کہاں جو خریدنا ہے انصاف وہاں ہو گا جہاں کوئی شئے کام نہ آئے گی نہ دولت نہ حیثیت نہ سفارش انصاف تو وہاں ہوگا۔ اللہ کریم صحیح شعور عطا فرمائیں۔
  آخر میں انہوں ملکی سلامتی اور بقا کی اجتماعی دعا بھی فرمائی

 اللہ کریم نے اس کرہ ارض پر ہر شئے کو با مقصد پید ا فرمایا ہے۔زمین و آسمان کی مخلوق کا شمار ممکن نہیں ہے ہر مخلوق اللہ کی تسبیح بیان کر رہی ہے ہر شئے کا رخ حضرت انسان کی طرف ہے۔یعنی کے وہ انسان کی ضرورت کو پورا کرنے میں لگی ہے۔اللہ کریم زمین کے سینہ سے انسان کو جہاں رزق دیتا ہے وہی وقت پورا ہونے میں یہ زمین ہمیں اپنی آغوش میں لے لیتی ہے۔اللہ کریم نے انسان کو وہ شعور عطا فرمایا ہے کہ قرب الٰہی کے وہ منازل طے کرتا جائے جو دوسری مخلوق سوچ بھی نہیں سکتی۔اور دوسرا بہت بڑا احسان یہ ہے کہ میں نے تم میں حضرت محمد ﷺ کو مبعوث فرما یا۔
 امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان کا سلطان فیڈ مل،شاہ پور صدر سرگودھا میں بعثت رحمت عالم ﷺ کانفرنس میں بہت بڑے اجتماع سے خطاب۔
  انہوں نے کہا کہ جو درِ مصطفے ﷺ سے اپنا تعلق قائم نہیں رکھتے وہ پھر در در پر سجدے کرتے ہیں۔لوگوں کی غلامیوں کے طوق ان کے گلے میں پڑے ہیں۔کسی کے گلے میں انا کا طوق ہے کسی کے گلے میں اپنی حیثیت کا طوق ہے۔بے شمار لوگ کہتے ہیں میں سجدے بھی کرتا ہوں نماز بھی پڑھتا ہوں پھر بھی تنگی نہیں جاتی فلاں ضرورت پوری نہیں ہوتی کیا ہم جب نماز کی نیت کرتے ہیں تو یہ کرتے ہیں کہ فلاں ضرورت کے لیے پڑھ رہے ہیں نماز تو فرض ہے۔یہ تو اللہ کا حکم ہے، اللہ کریم کا احسان ہے کہ ہمیں پانچ وقت اپنے حضور حاضر ہونے کی توفیق عطا فرمائی۔
  انہوں نے مزید کہا کہ ماہ مبارک ربیع الاول ہر سال ہمارے سینوں پر دستک دیتا ہے،ہماری سوچوں پر دستک ہے ہم نے پچھلے سال ربیع الاول سے لے کر اس سال ماہ مبارک ربیع الاول تک جو وقت بسرکیاوہ کیساتھا کیا اس میں ہم نے نبی کریم ﷺ کی اطاعت کی کیا ہمارا دعوی محبت کے ساتھ ہمارے اعمال اس کی گواہی دے رہے ہیں۔ہمیں اپنی نیتوں اور اپنے اعمال کو ٹٹولنے کی ضرورت ہے کہ ہم اتباع رسالت ﷺ میں کہاں کھڑے ہیں۔
یاد رہے کہ اس بابرکت پروگرام کا انعقاد ملک عطا محمد اعوان چیف ایگزیکٹو سلطان گروپ آف کمپنیز نے کیااستقبالیہ میں شہزاد عزیز نظامی،دل پزیر عباسی سی ایف او،محمد آصف حسنین بلوچ ایڈو و کیٹ لیگل ایڈوائز نے کیا۔ اس پروگرام میں جہاں ہر طبقہ فکر کے لوگوں نے شرکت کی وہاں سیاسی و سماجی شخصیات بھی شریک ہوئیں جن میں ملک شاکر بشیر اعوان ایم این اے،ملک آصف بھا ایم پی اے،ملک اشرف اعوان سابقہ چئیر مین،ملک سبطین گنجیرا،ملک عمران بشیر،ملک جاوید اعوان سابقہ ایم پی اے،چوہدری مبشر میکن بھی شامل تھے