Featured Events

اللہ کریم نے بعثت محمد الرسول اللہ ﷺفرما کر اس خطہ زمین کو مسجد کا درجہ عطا فرمادیا اور اس کرہ ارض سے اجتماعی عذابات کو بعثت عالی ﷺ کی برکت سے اُٹھا لیا۔حالانکہ ہمارے درمیان وہ تمام خصلتیں جو ان قوموں کے اندر موجود تھیں جن کی وجہ سے ان پر اجتماعی عذاب آئے اور نیست و نابود ہوئیں۔آج ہم ماہ ربیع الاول کی مبارک ساعتوں کو یاد کرتے ہیں تو اس کا شکر بھی ادا کریں کہ اللہ کریم نے ہمیں اُمت محمد الرسول اللہ ﷺ میں پیدا فرمایا۔ 
امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان کا ملتان ایونٹ کمپلیکس مارکی میں بعثت رحمت عالم ﷺ کانفرنس کے موقع پر خواتین و حضرات کی بڑی تعداد سے خطاب۔
  انہوں نے کہا کہ نماز کی ادائیگی بے حیائی اور برائی سے روکتی ہے آج ہم اپنی زندگیوں پر نظر ڈالیں تو کیا جب ہم مسجد سے نکلتے ہیں تو لین دین،بول چال میں کتنے کھرے ہیں،کتنا سچ بولتے ہیں کتنا دوسروں کے حقو ق کا خیال کرتے ہیں؟اس اُمتی کے رشتے کو پہچانیں،اس ماہ مبارک کی عظمت کو پہچانیں،اس ماہ مبارک ربیع الاول کا پچھلے گزرے ہوئے ماہ مبارک ربیع الاول سے موازنہ کیجیے اور اپنا جائزہ لیجیے کہ میں نے جو پچھلا ماہ مبارک منایا اس سے میری زندگی میں آج تک کیا تبدیلی آئی؟زندگی میں یہ مبارک دن پھر نصیب ہوا آج اس ماہ مبارک میں اپنی نبی کریم ﷺ سے محبت کی تجدید کریں اور اللہ کریم سے دعا کریں یا اللہ جو بھی گزر گیا اس کی کمی بیشی معاف فرما دیں میں گناہ گار ہوں میں محتاج ہوں تو بے نیاز ہے معاف فرمانے والا ہے میری گزری غلطیوں کو معاف فرما۔
  انہوں نے مزید کہا کہ ملکی موجودہ سیلابی صورت حال کو اللہ کا عذاب نہ کہو۔یہ دیکھو کہ ایک امتی کی حیثیت سے میرا معاشرے میں کیا کردار ہے؟گھر کے سربراہ سے لے کر ملکی سربراہ تک سب کو اپنا جائزہ لینے کی ضرورت ہے۔ہمیں اس کا درد نہیں معلوم جو اس سیلابی صورت حال میں اپنا سامان سر پر اُٹھائے ننگے پاؤں سائبان ڈھونڈتا پھر رہا ہے ہمیں اس کے درد کا احساس نہیں ہے۔یہ وہی جانتا ہے جو اس سے گزر رہا ہے۔جس کے پاس اختیا رہے وہ دیکھے کہ وہ اپنا اختیار کیسے استعمال کر رہا ہے۔ان سب کے لیے ایمان کی وہ کیفیت درکار ہے جو ہمارے دل میں دوسروں کے لیے درد پیدا کرے اگر یہ نصیب ہو جائے تو پھر بندہ اس وطن کے دفاع کے لیے جان بھی دے دیتا ہے 
 اگر ہم نے اس معاشرے کو تحفظ دینا ہے،امن دینا ہے تو ہمیں اپنے قوانین کو قرآن و سنت کے مطابق لانا ہو گا۔تاکہ ہر ایک کے لیے مساوات ہو۔ہر خاص و عام قانون کا پابند ہو۔
تصوف پر بات کرتے ہوئے انہوں نے کہا کہ یہ صدری علوم ہیں جو سینہ با سینہ چلے آ رہے ہیں اور ان کا تسلسل قلب اطہر محمد الرسول اللہ ﷺ سے جا ملتا ہے۔یہ کیفیات کا شعبہ ہے یہ نصیب ہوجائے تو بندہ خالص ہوتا چلا جاتا ہے۔بعد میں انہوں نے حال میں نئے بیعت ہونے والوں سے ظاہری بیعت بھی لی۔
اس با برکت پروگرام میں جہاں ہر طبقہ فکر سے تعلق رکھنے والے افراد نے شرکت کی وہاں خواتین کی بھی بہت بڑی تعداد موجود تھی ان کے علاوہ شوکت بوسن سابق ایم پی اے،ملک رضا محمد ربانی کھروفاقی وزیر،ڈاکٹر شفیق پتافی چیئر مین سن کراپ گروپ،ارشد انجم لنگڑیال انڈسٹریل کے علاوہ سیاسی و سماجی شخصیات کی بڑی تعداد نے شرکت کی۔اس کے علاوہ سلسلہ عالیہ کے ذمہ داران جن میں شیراز احمد صدر تنظیم الاخوان ملتان ڈویژن،ڈاکٹر اخلاق احمد جنرل سیکرٹری الاخوان ملتان،محمدجنید اللہ سیکرٹری نشرواشاعت،راؤ سجاد احمد،مسعود صابر،امجد اعوان سیکرٹری نشرواشاعت تنظیم الاخوان پاکستان،حکیم عبدالماجد جنرل سیکرٹری پنجاب الاخوان نے بھی شرکت کی۔ 
  آخر میں انہوں نے ملکی سلامتی اور سیلاب زدگان کے لیے خصوصی دعا بھی فرمائی

 میں نے تم میں اپنا حبیب ﷺ مبعوث فرمایا۔آپ ﷺ کی بعثت کے بعد کوئی سوال نہیں بچتا۔درِ مصطفے ﷺپر اپنے سوالا ت کو لے آؤ تمہاری تمام الجھنوں اورضرورتوں کا حل اورراہنمائی مل جائے گی۔درِ مصطفے ﷺ سے ملا ہوا حل ایسا انصاف ہوتا ہے جس میں نہ کوئی فاتح اور نہ مفتوح کہلاتا ہے۔ہم اپنی ضرورتوں کے لیے لوگوں سے آراء لے کر عمل کرتے ہیں بیشک وہ قرآن وسنت کے خلاف ہی کیوں نہ ہوں ہم انہیں اپنی مجبوری کہہ کر عمل کر جاتے ہیں اسے کیا کہیں گے؟جبکہ اللہ کریم فرما رہے ہیں میں نے تم میں اپنا محبوب مبعوث فرما دیا ہے۔اور یہ کل انسانیت کے لیے ہے۔ اور جو رشتہ اُمتی کا ہمیں عطا فرمایا ہے کیا ہم نے پچھلے ماہ مبارک سے لے اس ماہ مبارک ربیع الاول تک اپنا جائزہ لیا کیا ہم نے خود کو نبی کریم ﷺ کے ارشادات کے مطابق ڈھالا۔
 امیر عبدالقدیر اعوان شخ سلسلہ نقشبندیہ اویسیہ و سربراہ تنظیم الاخوان پاکستان کا ڈیرہ نور ربانی کھر(سنانواں) مظفر گڑھ میں جلسہ بعثت رحمت عالم ﷺ کے موقع پر خواتین و حضرات کی بہت بڑی تعداد سے خطاب۔
  انہوں نے کہا کہ محبت رسول ﷺ کو منانے سے لے کر اسے اپنانے تک دیکھنے کی ضرورت ہے کہ میں نے صبح سے لے کر شام تک جو وقت بسر کیا کیا میرے قول و فعل نبی کریم کی سنت کے مطابق ہیں۔میرے سمیت کیا ہم نے اپنا یہ جائزہ لیا؟نہیں لیا تو روز محشر اللہ کے حضور ہر ایک نے پیش ہونا ہے تب فرمایا جائے گا کہ میں نے تم میں وہ ہستی مبعوث فرمائی جس کے پاس تمہاری ہر ضرورت کا جواب تھا،تمہاری ہر خواہش کی تکمیل کی جائز حدود مقرر فرمائی گئیں تم نے کیا کیا؟پھر سمجھ آئیگی کہ ماہ مبارک ربیع الاول کو منا نا اس 12 ربیع الاول کو منانا کیسا ہے کیونکہ یہ وہ دن ہے جس میں ولادت باسعادت بھی ہے اور نبی کریم ﷺ نے دارِ دنیا سے پردہ بھی فرمایا۔جس شخص کو کوئی پاس بٹھانا بھی پسند نہ کرے اللہ کریم اسے بھی مخاطب فرما رہے ہیں کہ اے میرے حبیب ﷺ آپ اس کی بھی راہمائی فرما دیجیے یہ میرا بندہ ہے۔میں نے آپ کو اس کے لیے بھی مبعوث فرمایا ہے۔
  انہوں نے مزید کہا کہ یہ وہ بارگاہ ہے جہاں محبت بھی حدودو قیود کی پابند ہے آپ ﷺ رحمۃ اللعالمین ہیں آپ ﷺ کو امت کی تکلیف بہت گراں گزرتی۔آپ کی مثال ایسی ہے جیسے آگ میں پروانے جل رہے ہوں اور آپ ان کو اس آگ سے بچائیں۔دین کا ایک پہلو تعلیمات نبوت اور دوسرا پہلو برکات نبوت ہے۔یہ برکات نبوت ﷺ صدری علوم ہیں جو سینہ با سینہ چلے آرہے ہیں اور ان کا تسلسل قلب اطہر محمد الرسول اللہ ﷺ سے جا ملتا ہے انہیں ہی سلاسل تصوف کہا جاتا ہے۔
یاد رہے کہ یہ بابرکت پروگرام ملک غلام محمد نور ربانی کھرمرحوم اپنی نگرانی میں کراتے تھے ان کی وفات کے بعد ان کے صاحبزادے ملک غلام محمد رضا ربانی کھر سابق وفاقی وزیر جاری رکھے ہوئے ہیں اور خود ذاتی طور پر سارے انتظامات دیکھتے ہیں ان کے علاوہ محترمہ حنا ربانی کھر صاحبہ سابق وزیر خارجہ نے خصوصی شرکت کی۔
آخر میں انہوں نے ملکی سلامتی اور سیلاب زدگان کے لیے خصوصی دعا بھی فرمائی

امت محمدیہ کی پہچان انصاف ہے، ایسا انصاف جو غیر مسلم تک بھی پہنچے۔ مگر آج وطن عزیز کی سفید پٹی تک بھی انصاف نہیں پہنچ رہا۔ انسان کی اصل بنیاد اس کے عمل، لفظ اور نیت میں پوشیدہ ہے۔ اگر محبت رسول ﷺ سے سرشار ہو تو ہر لفظ ملک و ملت کی تعمیر کا ذریعہ بن سکتا ہے۔ صحافت، کاروبار یا عدالتی فیصلے ہوں، ہر شعبے میں فرض کی ادائیگی اور حلال و حرام کی تمیز ضروری ہے۔ 
ان خیالات کا اظہار شیخ سلسلہ نقشبندیہ اویسیہ اور سربراہ تنظیم الاخوان پاکستان، حضرت امیر عبدالقدیر اعوان مدظلہ العالی نے اسلام آباد میں بعثت رحمت عالم ﷺ کانفرنس اسلام آباد سے خطاب کرتے ہوئے کیا۔* 
حضرت امیر عبدالقدیر اعوان نے کہا کہ یہ وہ لمحہ ہے جب قوم کو اپنے مسائل کے حل کے لیے قرآن وسنت اور احادیث مبارکہ کی طرف رجوع کرنا تھا مگر ہم نے وہ راستہ چھوڑ دیا۔ آج سود کو ''پرافٹ'' اور حرام کو ''جائز'' کہہ کر حقائق کو مسخ کیا جا رہا ہے۔ ہم اپنے حقوق کے لیے تو آواز بلند کرتے ہیں، مگر اپنے فرائض کی ادائیگی پر خاموش ہیں۔
انہوں نے کہا کہ کائنات کی ہر شئے اللہ کریم کی تسبیح کرتی ہے اور یہی تسبیح اس کی حیات کا سبب ہے۔ انسان اور جن دو ایسی مخلوقات ہیں جنہیں اختیار دیا گیا ہے کہ وہ چاہیں تو شکر ادا کریں یا ناشکری۔ اللہ تعالیٰ انہیں غور و فکر کی دعوت دیتا ہے کہ کائنات کا نظام کیسے قائم ہے، زندگی کا آغاز و انجام کیا ہے اور اس کے نتیجے میں ابدی زندگی کیا حاصل کرے گا۔ اسی مقصد کے لیے اللہ تعالیٰ نے اپنے برگزیدہ انبیاء کو مبعوث فرمایا اور اس کی تکمیل حضور اکرم ﷺ کی بعثت سے ہوئی۔
شان رسالت کا ذکر کرتے ہوئے انہوں نے فرمایا کہ شانِ رسالت ایسی ہے جس کو اللہ تعالیٰ نے اپنے مقدس کلام میں بیان فرمایا ہے، مخلوق کے لیے اس شان کو بیان کرنے کی جرات ممکن نہیں، البتہ بطورِ امتی یہ سعادت ضرور حاصل کی جا سکتی ہے۔ حضور ﷺ کی اطاعت اتنی بلند ہے کہ معراج کی شب بیت المقدس میں تمام انبیاء کو حضور ﷺ کی عظمت کے اظہار کے لیے دوگانہ ادا کرنے کا شرف بخشا گیا۔
انہوں نے مزید فرمایا کہ آج دنیا کے لیڈر قوتِ غضبیہ اور قوتِ شہوانیہ کے زیرِ اثر دنیا کے نقشے بدل رہے ہیں، جبکہ حضور ﷺ کے زیرِ سایہ صحابہ کرام رضی اللہ عنہم نے ان قوتوں کو قابو میں کیا اور انہیں خیر کے راستے پر لگایا۔ قومیں دراصل انسانوں سے بنتی ہیں، زمین، دریا اور پہاڑ کسی ملک کی شناخت نہیں بلکہ اس کے باسی اس کا اصل سرمایہ ہیں۔
معزز مہمانان گرامی میں سے?ممبر قومی اسمبلی علی محمد خان نے اپنے خیالات کا اظہار کرتے ہوئے کہا کہ ملک کے دارالحکومت میں ایک مسجد شہید کردی گئی لیکن حکمرانوں کے کانوں پر اس وقت تک جوں بھی نہیں رینگی جب تک علماء کرام و عوام الناس نے احتجاج کر کے اس جگہ دوبارہ مسجد کی تعمیر کی یقین دہانی نہ کروا لی۔
تحریک نوجوانان پاکستان کے قائد عبداللہ گل صاحب نے حضرت شیخ المکرم مدظلہ العالی کے ساتھ اپنے نسبت کا اظہار کرتے ہوئے کہا کہ آپریشن بنیان المرصوص کی بنیاد بہت پہلے شیخ سلسلہ نقشبندیہ اویسیہ حضرت امیر اکرم اعوان رح کی سوچ نے رکھ دی تھی جس میں کامیابی افواج پاکستان نے اسی سوچ کو اختیار کر کے حاصل کی۔
سابق سینیٹر مصطفیٰ نواز کھوکھر نے اپنے خیالات کا اظہار کرتے ہوئے کہا کہ ماہ مبارک ربیع الاول جہاں ہمیں بطور مسلمان جھنجھوڑتا ہے وہیں ہمیں ملک پاکستان کے مسائل کا بھی ادراک کرواتا ہے۔
اسلامی اصولوں پر عمل اور ملکی عدالتی نظام کے بارے میں حضرت شیخ المکرم مدظلہ العالی نے کہا کہ وطن کو اسلام کے اصولوں سے مزین کرنے کی ضرورت ہے۔ چاہے وہ ذاتی اصلاح ہو یا اجتماعی، قومی یا بین الاقوامی سطح پر۔ انہوں نے کہا کہ سیلاب زدگان کی حالت زار ہم سب کا اجتماعی درد ہے اور ہمیں ایسا نظام قائم کرنا چاہیے جو ان مشکلات کو حل کرے۔
انہوں نے مزید کہا کہ اکثر ہم سے پوچھا جاتا ہے کہ ہم کشمیر، غزہ اور شام کے مسلمانوں کے لیے کیا کر رہے ہیں؟ تو جواب یہ ہے کہ کسی کی مدد کے لیے سب سے پہلے اپنی بنیاد مضبوط کرنا ضروری ہے۔ جب تک ہم اپنے پیروں پر کھڑے نہیں ہوں گے دوسروں کے لیے کچھ نہیں کر سکیں گے۔
انہوں نے ملکی عدالتی نظام پر بات کرتے ہوئے کہا کہ آزادی کے بعد بھی مجریہ 1885 جیسے قوانین کے تحت فیصلے سنائے جا رہے ہیں جو لمحہ فکریہ ہے۔ آخر قیامت کے دن یہ کیسے جواز پیش کیا جا سکے گا کہ اسلام کے نام پر حاصل ہونے والی زمین پر غیر اسلامی قوانین کا اطلاق کیا گیا؟
ایمان اور تصوف کا تعلق کے بارے میں وضاحت کرتے ہوئے?انہوں نے عشقِ مصطفی ﷺ کو زندگی کی دھڑکن قرار دیتے ہوئے کہا کہ ایمان کی اصل کیفیت خالص اطاعتِ الٰہی میں ہے، نہ کہ صرف ظاہری عبادات میں۔ دینِ اسلام صرف عبادات کا مجموعہ نہیں، بلکہ مکمل ضابط حیات کا نام ہے جو ایمان، عبادت اور معاملات تینوں کو یکجا کرتا ہے۔ قرآن کریم میں رکوع و سجود کو نہ صرف جسمانی عمل بلکہ روحانی تعظیم کا مظہر قرار دیا گیا ہے۔ رکوع، ربِ عظیم کے سامنے جھکنے کی علامت ہے، اور سجدہ، اس عاجز بندے کی وہ کیفیت ہے جب وہ اپنے بلند ترین وجود کو زمین پر رکھ کر ربِ اعلیٰ کی بارگاہ میں فنا ہو جاتا ہے۔
تصوف پر گفتگو کرتے ہوئے انہوں نے فرمایا کہ سلاسلِ تصوف کیفیاتِ قلبی کے حصول کا ذریعہ ہیں، جن کے لیے مجاہدہ کیا جاتا ہے۔ اصل حاصل یہ ہے کہ ان کیفیات کا اثر عملی زندگی میں نظر آئے اور انسان صحت و بیماری، زندگی و موت، خوشی و غمی جیسے حالات میں بھی درست رخ اختیار کرے۔
آخر میں حضرت امیر عبدالقدیر اعوان مدظلہ العالی نے فرمایا کہ اس پروگرام کا انعقاد ذاتی تشہیر یا سلسلہ کی ترویج کے لیے نہیں کیا گیا بلکہ قرآن و سنت کی ہدایت اور اپنے شیخ کے حکم کے تحت کیا گیا تاکہ ربیع الاول کی بابرکت ایام میں بعثتِ نبوی ﷺ کے پیغام اور برکات کو اجاگر کیا جا سکے۔?کانفرنس میں علمائے کرام، مختلف شعبہ ہائے زندگی سے تعلق رکھنے والے افراد اور بڑی تعداد میں مرد و خواتین نے شرکت کی۔ آخر میں ملک و ملت کی سلامتی، ترقی اور امتِ مسلمہ کے اتحاد کے لیے خصوصی دعا کی گئی۔۔
یاد رہے کہ اس با برکت پروگرام میں جہاں ہر طبقہ فکر سے تعلق رکھنے والے افراد نے شرکت کی وہاں پاکستان کی سیاسی،سماجی و مذہبی شخصیات کی بھی بڑی تعداد نے شرکت کی جن میں مصطفے نواز کھوکھر،عبداللہ گل،ڈاکٹر طارق فضل چوہدری ایم این اے،چوہدری شیر علی،علی محمد خاں ایم این اے،چوہدری نعیم اعجاز ایم پی اے،چوہدری ندیم اعجاز،غلام سرور خاں،غلام مصطفے ملک،ملک ابرار ایم این ا ے،راجہ جاوید کوثر ایم پی اے گجر خان،راجہ زولفقار زرتاج ہاؤسنگ،ریاست علی آزاد،چوہدری رفعت،کرنل اسلم،ملک مظہر،ملک عطا صاحب،آشر جتوئی صاحب صدر نیشنل پریس کلب اسلام آبادشامل تھے۔۔