Featured Events

گوجر خان: الفلاح فاؤنڈیشن پاکستان کے زیر اہتمام فری میڈیکل کیمپ کا انعقاد کیا گیا، جس میں شیخ سلسلہ نقشبندیہ اویسیہ حضرت امیر عبدالقدیر اعوان مدظلہ العالی نے اپنی انتہائی مصروفیات کے باوجود خصوصی دورہ کیا ۔۔۔ حضرت امیر عبدالقدیر اعوان مدظلہ العالی نے کیمپ میں موجود تمام سپیشلسٹ ڈاکٹروں سے ملاقات کی اور خدمت خلق کی کوششوں کو جاری رکھنے کی ہدایت فرمائی۔یہ کیمپ بروز اتوار 16 نومبر  2025بمقام  گاؤں چکی تحصیل گوجر خان ضلع راولپنڈی میں 10 بجے سے 1 بجے تک سیکرٹری نشر و اشاعت الاخوان امجد اعوان صاحب کے گھر میں جاری رہا۔الفلاح فاؤنڈیشن پاکستان سلسلہ نقشبندیہ اویسیہ کی ذیلی تنظیم ہے اور یہ اپنی تمام خدمات زیر نگرانی شیخ سلسلہ نقشبندیہ اویسیہ حضرت امیر عبدالقدیر اعوان مدظلہ العالی کے سرانجام دے رہی ہے۔آج کے میڈیکل کیمپ میں میڈیکل سپیشلسٹ ۔ چائلڈ سپیشلسٹ ۔ سکن سپیشلسٹ ۔أئی سپیشلسٹ ۔ فزیو تھراپسٹ اور ماہر امراض نسواں ڈاکٹرز کی ٹیم نے مریضوں کا معائنہ کیا اور مفت ادویات دی گئیں۔اس میڈیکل کیمپ کا انعقاد جہاں ضرورت مند کیلیے ہے وہاں سفید پوش طبقے کو بھی بہت فائدہ ہے۔ صاحب مجاز محمد ارشد صاحب نے کیمپ کا دورہ کیا اور انتظامات پر اطمینان کا اظہار کیا۔کیمپ کا افتتاح ایم ۔ پی ۔ اے جناب شوکت بھٹی صاحب نے کیا۔۔معززین علاقہ کے علاوہ بڑی تعداد میں سیاسی سماجی مذہبی شخصیات کے علاوہ صحافیوں نے بھی کیمپ میں شرکت کی ۔الفلاح فاؤنڈیشن پورے پاکستان میں اپنی خدمات بلا سیاسی ،مزہبی تفریق کے ادا کر رہی ہے ۔اس کی بنیاد حضرت امیر محمد اکرم اعوان رح نے رکھی اور اس کی سرپرستی شیخ سلسلہ نقشبندیہ اویسیہ حضرت امیر عبد القدیر اعوان مدظلہ العالی کر رہے ہیں ۔۔مریضوں نے الفلاح فاؤنڈیشن کا شکریہ ادا کیا اور شیخ سلسلہ نقشبندیہ اویسیہ کو دعاؤں سے نوازا الفلاح فاؤنڈیشن کے ذمہ داران نے اس عزم کا ارادہ کیا کہ وہ زیر نگرانی شیخ سلسلہ نقشبندیہ اویسیہ امیر عبدالقدیر اعوان مدظلہ العالی اسی طرح کے بے شمار فری میڈیکل کیمپس کا انعقاد

جیسے وجود کے لیے خوراک کی ضرورت ہے ایسے ہی روح کے لیے ایمان اور عبادات کی ضرورت ہوتی ہے اگر ایمان اور عبادات نہ ہوں تو روح کمزور ہو جاتی ہے۔جہاں عقیدہ نہ ہوپھر ہر شئے ہونے کے باوجود بھی زندگی بے معنی لگتی ہے۔ہر بندے میں اللہ کریم نے یہ استعداد رکھ دی ہے کہ وہ حق اور ناحق کو پہچان سکے۔ہم اللہ کریم کو اتنا ہی جان سکتے ہیں جتنا اُس نے انبیاء ؑ کے زریعے ہمیں اپنے بارے بتایا ہے مخلوق میں یہ استعداد نہیں کہ اللہ کی ذات کو خود سے جان سکے۔
 امیر عبدالقدیر اعوان شیخ سلسلہ نقشبندیہ اویسیہ وسر براہ تنظیم الاخوان پاکستان کا جمعتہ المبارک کے روز خطاب۔
  انہوں نے کہا کہ بیت اللہ شریف میں اللہ کریم نے بے شمار برکات رکھی ہیں۔حج کرنے والاگناہوں سے اس طرح پاک ہو جاتا ہے  جیسے آج پیدا ہوا ہے۔برکات میں قرب ا لٰہی اور رحمت الٰہی بھی شامل ہے۔اللہ کریم نے مخلوق کو جس عبادت کا حکم فرمایا ہے اس کا فائدہ مخلوق کو ہی ہے اللہ کریم تو بے نیاز ہیں اور مخلوق محتاج ہے۔ایمان کے بعد جو عبادات نصیب ہوتی ہیں اس سے بندگی کی توفیق عطا ہوتی ہے۔اللہ کا قرب نصیب ہوتاہے۔انسان اس کائنات میں ایک اکائی ہے اس حضرت انسان پر اللہ کریم نے بہت زیادہ احسانات فرمائے ہیں۔اس کی ہر طرح سے رہنمائی فرمائی ہے۔جس سے سہولت بھی ملتی ہے اور اجروثواب بھی عطا ہوتا ہے۔اللہ کریم نے جب انسان کو پیدا فرمایا ہے تو اس کی راہنمائی کے لیے زندگی گزارنے کے اصول اور ضابطے بھی ارشاد فرمائے ہیں۔جو اللہ کے حکم کے مطابق زندگی بسر کرے گا وہ دنیا و آخرت دونوں جہانوں میں کامیاب ہوگا۔ورنہ ایسے لوگ بھی ہوئے ہیں جنہوں نے زندگی بیت اللہ شریف میں بسر کی لیکن ایمان بھی نصیب نہ ہوا۔بیت اللہ شریف کی حاضری اگر رواجات کی نذر کر دیں گے تو کیا حاصل؟ اللہ کریم صحیح شعور عطا فرمائیں۔
  آخر میں انہوں نے ملکی سلامتی اور بقا کی اجتماعی دعا بھی فرمائی

بیت اللہ شریف کرہ ارض پر ایسا مقام ہے جہاں تجلیات باری کا نزول ہو رہا ہے۔اللہ کریم نے یہ مرکزیت کل عالم اسلام کو عطا فرمائی ہے . بیت اللہ شریف کی حاضری بندہ مومن کے باطن کو پاکیزہ کر دیتی ہے۔آج ہم نے اس مقدس عمل کو رواجات کی نذ ر کر دیا ہے ہمارے معاشرے کے ہر طبقہ فکر سے تعلق رکھنے والے افراد ہر سال حج و عمرہ کے لیے جاتے ہیں اس کے باوجود ہمارے لین دین میں ایمانداری اور کھرا پن نہیں ہے۔بیت اللہ شریف موجود ہے اور طواف جاری ہے یہ طواف بقائے دنیا کا سبب ہے جس دن طواف رکے گا اُس دن اس دنیا کی بساط لپیٹ دی جائے گی۔
 امیر عبدالقدیر اعوان شیخ سلسلہ کا دوروزہ ماہانہ روحانی تربیتی اجتماع پر خواتین و حضرات کی بڑی تعداد سے خطاب۔
  انہوں نے کہا کہ رواجات کو عبادات میں داخل کرنا بہت بڑی زیادتی ہے۔اس لیے ہمیں اس بات کا دھیان رکھنا چاہیے کہ جب ہم حرم شریف جاتے ہیں تو اس کی نزاکت کو ملحوظ خاطر رکھیں۔عبادات میں توجہ بڑی بنیادی بات ہے۔جس عبادت میں توجہ نہیں ہو گی وہ نتائج نہیں دے گی۔کسی بھی نیک عمل سے مزید وری تقوی نصیب ہوتا ہے۔مزید نیکی کی استعداد پیدا ہوتی ہے۔کثیر تعداد ایسی ہے جو ان با برکت مقدس مقامات سے ہو کر آتی ہے کیا ہمارے کردار سے اس کی برکات عیاں ہوتی ہیں؟ جتنے بھی اسلامی ملک ہیں ان میں اسلامی احکامات کو جب ہم دیکھتے ہیں کوئی سمجھ نہیں آتی کہ ہماری بیت اللہ شریف کی حاضری میں کہاں کمی رہ جاتی ہے کہ اس کے اثرات ہماری زندگیوں میں نظر نہیں آتے۔
  انہوں نے مزید کہا کہ ہمارے ماننے کے ساتھ صدق نہیں ہے۔ہم ایمان میں یقین کے اُس درجہ تک نہیں پہنچ سکے جو درکار ہے۔ہم نماز پڑھتے ہیں لیکن ہمارے اندر برائی بھی موجود ہے اور بے حیائی بھی۔ہم پر نماز کے نتائج اور اس کے اثرات مرتب کیوں نہیں ہو رہے؟ ہمیں اپنا تجزیہ کرنے کی ضرورت ہے کہ جو میں کہہ رہا ہوں جو کر رہا ہوں کیا میرے اندر بھی یہی بات ہے یا اندر کچھ اور ہے نہاں خانہ دل میں کیا ہے؟حرمین شریف میں جسے موت نصیب ہوئی قیامت کے روز جب اُٹھے گا اسے دوزخ کا خوف نہ ہوگا ایسی برکات ہیں ان مقدس مقامات کی لیکن ہم پر ان کی حاضری سے کوئی فرق نہیں پڑ رہا۔اللہ کریم صحیح شعور عطا فرمائیں۔
  آخر میں انہوں نے ملک و قوم کے لیے اجتماعی دعا بھی فرمائی

آج معاشرے میں انصاف کے حصول کے لیے بھی ظلم کیا جا رہا ہے۔جیسے آگ کو آگ سے بجھانے کی کوشش ہو جو کہ نا ممکن عمل ہے۔
 اللہ کریم نے ہمیں دین اسلام عطا فرمایا اس حق کا اقرار کرلینے کے بعد بھی ہم شرمندہ شرمندہ سے مسلمان ہیں۔ ادیان باطلہ کے ماننے والے ہم سے زیادہ یقین کے ساتھ اپنے مذہب کی تبلیغ کر رہے ہیں حالانکہ دین اسلام ہر بندے کو عقیدہ رکھنے کی اجازت دیتا ہے۔آج کا بہت بڑا دھوکہ یہ ہے کہ انسانیت ہی مذہب ہے جبکہ اسلام نے انسانیت کے اسلوب سکھائے اگر انسانیت میں سے اسلام کو نکال دیا جائے تو پیچھے صرف حیوانیت رہ جاتی ہے۔
 امیر عبدالقدیر اعوان شیخ سلسلہ نقشبندیہ اویسیہ و سر براہ تنظیم الاخوان پاکستان کا جمعتہ المبارک کے روز خطاب۔
  انہوں نے کہا کہ ریاستِ اسلامی ہر ایک کو زندہ رہنے اور عقیدہ رکھنے کا حق دیتی ہے۔کسی پر کوئی ذبردستی نہیں کی جاتی۔جہاں ان کی جان،مال اور عزت کی اسلامی ریاست کی ذمہ داری ہے وہاں ان کی عباد ت گاہوں کی بھی ریاست ذمہ دارہے۔ہمیں اپنی حیثیت اپنا اقتدار بہت عزیز ہے ہم بھول جاتے ہیں کہ بڑے بڑے مقتدر لوگ دنیا میں آئے اور فنا ہو گئے ہمیں بھی اس فانی جہان کو چھوڑ کر ایک دن جانا ہے۔یہ حکومتیں یہ طاقتیں یہ اقتدارو اختیارات ہی سب کچھ نہیں ہے جس کو ہم نے زندگی کا حاصل سمجھ لیا ہے اور اسی کے پیچھے زندگی گزار دی ہے۔عوام چیخ و پکار کر رہی ہے کوئی سننے والا نہیں کسی کو عوام کے درد دکھائی نہیں دے رہے سب اپنی طاقت میں مگن ہیں۔
  انہوں نے مزید کہا کہ ہم کسی غلطی کی اصلاح کے لیے انصاف کا پہلو اختیار نہیں کرتے بلکہ مزید ظلم کر رہے ہوتے ہیں اور کہتے ہیں یہ اس لیے ہے کہ غلطی دور ہو جائے۔ایسے کرنے سے نتائج تکلیف دہ ہی ہوں گے۔ اس طرح کوئی مثبت تبدیلی تو آنے سے رہی۔ہمیں ضرورت ہے کہ ہم وہ راستہ اختیار کریں جو نبی کریم ﷺنے ہمارے لیے پسند فرمایا ہے۔اسی میں دنیا و آخرت کی کامیابی ہے۔
  یاد رہے کہ 8،9 نومبر بروز ہفتہ اتوار مرکز دارالعرفان منارہ میں ماہانہ روحانی اجتماع منعقد کیا گیا ہے جس میں پاکستان بھر سے سالکین سلسلہ عالیہ اپنی تربیت کے لیے تشریف لاتے ہیں۔شیخ المکرم مد ظلہ العالی اتوار دن گیارہ بجے خطاب فرمائیں گے اور اجتماعی دعابھی ہوگی۔دعوت عام ہے کہ اپنے دلوں کو برکات نبوت ﷺ سے منور کرنے کے لیے تشریف لائیے

تزکیۂ نفس، اخلاصِ قلب، سیرتِ نبوی ﷺ سے رہنمائی اور نسلِ نو کے لیے خاندانی نظام کی بحالی پر زور
اسلام آباد: شیخِ سلسلہ نقشبندیہ اویسیہ حضرت امیر عبدالقدیر اعوان مدظلہ العالی اپنے کامیاب روحانی تربیتی دورۂ کینیڈا و امریکہ مکمل کرنے کے بعد وطن واپس پہنچ گئے۔
اسلام آباد انٹرنیشنل ایئرپورٹ پر ان کا فقیدالمثال استقبال کیا گیا۔ اس موقع پر راولپنڈی، اسلام آباد اور پشاور ڈویژن کے ذمہ داران، صاحبِ مجازین، سالکینِ سلسلہ نقشبندیہ اویسیہ، عقیدت مندوں، دوستوں اور احباب کی ایک بڑی تعداد موجود تھی جنہوں نے اپنے محبوب شیخ المکرم کا پُرجوش انداز میں خیرمقدم کیا۔
حضرت امیر عبدالقدیر اعوان نے اپنے اس دورہ کے دوران کینیڈا کے شہروں برامپٹن (Brampton)، اجکس (Ajax)، مسی ساگا (Mississauga, Ontario) اور امریکہ کے شہروں شکاگو (Chicago)، ووسٹر، میساچوسٹس (Worcester, MA)، ورنن، کنیکٹیکٹ (Vernon, CT)، کیانزبرگ، نیو جرسی (Keansburg, NJ)، کیٹنزویل، میری لینڈ (Catonsville, MD)، ویسٹ چیسٹر، پنسلوینیا (West Chester, PA) اور بالٹی مور (Baltimore, MD) میں بعثتِ رحمتِ عالم ﷺ کانفرنسز اور متعدد روحانی پروگراموں میں خطاب فرمایا۔
ان پروگراموں میں ذکر الله، تزکیہ نفس، تصوف و سلوک، اورطریق سلسلۂ نقشبندیہ اویسیہ کی تعلیمات پر روشنی ڈالی گئی، جن سے مقامی احباب، سالکینِ سلسلہ، خواتین و حضرات اور بالخصوص نسلِ نو کی بڑی تعداد نے استفادہ کیا۔
اپنے خطابات میں حضرت شیخِ المکرم  نے فرمایا کہ انسان کی اصل پہچان اس کا دل ہے۔ جب دل اللہ کی یاد سے روشن ہو جاتا ہے تو بندے کے فیصلے بھی اللہ کی رضا کے مطابق ہونے لگتے ہیں۔ صوفیائے کرام ہمیشہ دلوں کی اصلاح پر محنت کرتے ہیں تاکہ اعمال خالصتاً اللہ کے لیے ہوں۔
انہوں نے فرمایا کہ ایمان کی روشنی اور دلی خلوص ہی معاشرتی سکون کی بنیاد ہیں۔ آج کا انسان جدت اور ترقی کے باوجود اضطراب، anxiety disorders اور ڈپریشن کا شکار ہے، کیونکہ اس نے اپنے معاملات کو دین سے جدا کر لیا ہے۔ حقیقی اطمینان صرف اسی وقت حاصل ہوتا ہے جب زندگی کو قرآن و سنت کے مطابق ڈھالا جائے۔
انہوں نے فرمایا کہ مسلمانوں کو اپنی کمزوریوں سے نکل کر مضبوط بننے کی ضرورت ہے تاکہ اقوامِ عالم میں ان کی بات سنی جائے۔ دنیا کی تاریخ گواہ ہے کہ کمزور ہمیشہ مسائل کا شکار رہتا ہے۔
انہوں نے خاندانی نظام اور رشتوں کے احترام پر خصوصی زور دیا۔ فرمایا کہ والدین، اولاد اور خاندان کے درمیان تعلقات کو مضبوط بنانے کے لیے ضروری ہے کہ والدین اپنی اقدار نسلِ نو تک منتقل کریں، ان کے ساتھ وقت گزاریں، اور سیرتِ نبوی ﷺ پر اجتماعی مطالعے کی روایت قائم کریں۔ قرآنِ کریم زندگی کا مکمل ضابطۂ حیات ہے اسے صرف تلاوت کے لیے نہیں بلکہ سمجھ کر عمل کرنے کے لیے نازل کیا گیا ہے۔
انہوں  نے مزید فرمایا کہ اگرچہ جدید دور سہولتیں فراہم کر رہا ہے، مگر اس نے انسان کو تنہائی میں مبتلا کر دیا ہے۔ آج کے اس دور میں نظم و ضبط، خاندانی نظام، اور رشتوں کے احترام پر ازسرِنو توجہ دینے کی ضرورت ہے۔
دورے کے دوران حضرت امیر عبدالقدیر اعوان مدظلہ العالی نے مختلف مسلم کمیونٹیز، مذہبی و سماجی رہنماؤں سے ملاقاتیں کیں اور امتِ مسلمہ کے اتحاد، عالمی امن اور روحانی اصلاح جیسے اہم موضوعات پر رہنمائی فرمائی۔ آپ کے خطبات نے کینیڈا و امریکہ میں مقیم مسلمانوں کے دلوں میں اسلام کی اصل روح، محبت، اخوت اور تربیت محمدی ﷺ کو تازہ کر دیا۔
یہ روحانی تربیتی دورہ محبت، اتحادِ مسلمہ اور ذکرِ الٰہی کے پیغام کو عام کرنے کا ذریعہ بنا، جس نے نہ صرف شمالی امریکہ بلکہ دنیا بھر میں مقیم درد دل رکھنے والے مسلمانوں کے قلوب پر گہرا روحانی اثر چھوڑا۔
آخر میں حضرت شیخ المکرم مدظلہ العالی نے اسلام آباد ایئرپورٹ استقبال کے لیے آنے والے احباب سے گرم جوشی سے خصوصی مصافحہ فرمایا، جبکہ احباب و دوستوں نے اظہارِ محبت کے طور پر پھولوں کے گلدستے پیش کیے